Бокс жұлдызы 31 жасында нокауттан жарақат алғаннан кейін қайтыс болды

Фото: David Fitzgerald/Sportsfile via Getty ImagesФото: David Fitzgerald/Sportsfile via Getty Images

Ирландиялық кәсіпқой боксшы Ли Ривз рингте ауыр ми жарақатын алғаннан кейін үш ай ауруханада жатып, көз жұмды, деп хабарлайды Tengri Sport.

Ли Ривз тамыздағы жекпе-жекте жарақат алуына байланысты жасанды комаға түскеннен кейін туындаған асқыну салдарынан 31 жасында көз жұмды. Боксшы 16 қарашада жақындарының ортасында өмірден өтті.

Instagram-дағы бұл жарияланымды көру

Ring Magazine (@ringmagazine) жарияланымы

Айта кетейік, бұған дейін Ривз 1 тамызда Дублиндегі (Ирландия) 3Arena-да Гэри Каллимен жекпе-жектің оныншы раундында нокаутқа түсіп, содан бері жасанды комада жатқан. Бұл кездесуде супержеңіл салмақтағы бос тұрған BUI Celtic титулы сарапқа салынған.

Ривз соңғы раундта екі рет нокдаунға түсіп, есінен танып, рингтен зембілмен шығарылды.

Миына қан құйылуына байланысты қысымды төмендету үшін оған Дублинде шұғыл ота жасалды, ал қазанда отбасына жақын болуы үшін Лимерик университетінің ауруханасына ауыстырылды. Біраз уақыттан кейін спортшының жағдайы жақсара бастады – ол кейбір аппараттардан ажыратылып, физиотерапия басталған, алайда демалыс күндері тағы бір инфекция жұқтырып алды.

Ривз кәсіпқой рингте 2018 жылы дебют жасап, 18 жекпе-жек өткізген(16 жеңіс, 2 жеңіліс, 11 нокаут). Ол әуесқойлар арасында Ирландияның бес дүркін чемпионы атанды. Бокстан тыс уақытта Ирландия қорғаныс күштерінің Лимерикте орналасқан 12-ші батальонында сарбаз болып қызмет еткен.

Сондай-ақ ол психикалық денсаулық саласындағы жұмысымен де танымал болды. Анасы Кэти өз-өзіне қол жұмсағаннан кейін Ривз Limerick Treaty Suicide Prevention ұйымының елшісі болып, өз қаласындағы тиісті бастамаларды белсенді қолдады. Достары мен жақындары оны рингте де, өмірде де соңына дейін күрескен адам ретінде еске алады.

Instagram-дағы бұл жарияланымды көру

Limerick Treaty Suicide Prevention (@treatysuicideprevention) жарияланымы

Жұлдызды боксшы метродағы шабуылдан кейін 40 жасында қайғылы қазаға ұшырады