+7 (777) 001 44
99
17 маусымға қараған түні футболдан Әлем чемпионатында I және J топтарындағы матчтер өтті. Бұл ойындардың басты кейіпкерлері турнир жұлдыздары - аргентиналық Лионель Месси, француз Килиан Мбаппе және норвегиялық Эрлинг Холанд болды, деп хабарлайды Tengri Sport.
Мбаппе Франция құрамасына алғашқы жеңісті сыйлады
I тобының алғашқы матчында француздар өздерінің бұрынғы отары болған Сенегал құрамасына қарсы ойнады. Есеп тек 66-минутта ашылды - Мбаппе шабуылды шебер түйіндеді.
82-минутта Брэдли Барколя басымдықты еселесе, 95-минутта Сенегал Мбайенің күшімен есеп айырмасын қысқартты.
Нүктені Килиан Мбаппе қойды - арада бір минут өткенде француз айып алаңының сыртынан дәлдігі керемет соққы жасады.
Қорытынды есеп - 3:1 Франция құрамасының пайдасына.
Норвегия Холандтың дублі арқасында Франциямен бір топта көш бастады
Мбаппеге турнирдің тағы бір жұлдызы - норвегиялық Эрлинг Холанд жауап қайтара алды. Оған Ирак құрамасының қақпасына дубль жасау үшін небәрі 43 минут қажет болды.
Норвегиялық алып екі допты да өзіне тән стильде соқты: 26-минутта қақпашы алаңынан келген пасты голға айналдырса, 43-минутта қақпашыға прессинг жасады.
Холандтың голдарының арасында Айман Хуссейн де көзге түсті - ол 39-минутта норвегиялықтардан әуеде айласын асырып, әдемі гол соқты.
Екінші таймда скандинавиялықтар қарсыластарын тағы екі мәрте ренжітті. 76-минуттағы бұрыштама Лео Эстигордың голымен аяқталса, 96-минутта кезекті пастан кейін доп Хуссейннен Ирак қақпасына барып түсті.
Қорытынды есеп - 4:1 Норвегияның пайдасына. Скандинавиялықтар доп айырмашылығы бойынша француздардан озып кетті.
I тобындағы жағдай
- Норвегия - 3 ұпай (+3)
- Франция - 3 ұпай (+2)
- Сенегал - 0 ұпай (-2)
- Ирак - 0 ұпай (-2)
Лео Мессидің тарихи хет-тригі
Қазіргі әлем чемпиондары үшін титулды қорғау Алжирге қарсы ойыннан басталды. Команда капитаны Лео Месси футбол тарихында қатарынан алты әлем чемпионатында ойнаған алғашқы футболшы атанды.
Бірақ 38 жастағы аргентиналыққа тек ойынға қатысу аздық етті. Ол 17-минуттың өзінде есеп ашса, 76-минутқа қарай хет-трик жасады. Алғашқы екі голды қақпашының қателігі деуге болса, үшінші гол турдың сәніне айналды.
Осы хет-триктің арқасында Месси әлем чемпионаттары тарихындағы үздік сұрмергендер тізімінде көш бастады. Оның еншісінде 16 гол бар, бұл көрсеткіш бойынша ол германиялық Мирослав Клоземен теңесті.
Австрия Иорданияны бет қаратпай жеңді
Ойын күнінің соңғы матчы Еуропа мен Азияның кезекті текетіресі болды. Австрия - Иордания кездесуінде есепті 21-минутта немістің "Вердер" клубында ойнайтын Романо Шмидт ашты.
Екінші таймның басында, 50-минутта иорданиялық Али Олван есепті теңестіре алды. Алайда 67-минутта Марко Арнаутович австриялықтарды қайта алға шығарғанымен, доп қолмен ойналғаны үшін есептелмеді.
Дегенмен, 10 минуттан кейін австриялықтар екінші голды ережеге сай соқты - ол Аль Арабтың өз қақпасына соққан голы ретінде тіркелді.
Қосымша уақыттың соңында төреші иорданиялықтардың айып алаңында қолмен ойнау тәртібін байқап, олардың қақпасына пенальти белгіледі. Оны Марко Арнаутович сенімді орындады.
Айта кетейік, Австрия әлемдік рейтингте 24-орында тұрса, Иордания небәрі 63-орынды иеленген.
Қорытынды есеп - 3:1 Австрияның пайдасына.
J тобындағы командалардың жағдайы
Аргентина - 3 ұпай (+3)
Австрия - 3 ұпай (+2)
Иордания - 0 ұпай (-2)
Алжир - 0 ұпай (- 3)
Еске сала кетейік, футболдан әлем чемпионатының топтық кезеңінің алғашқы туры ертең аяқталады. Ойынға Өзбекстан, Португалия, Англия, Хорватия және басқа да командалар қосылады.
