Месси мансабын аяқтау туралы пікір білдірді: аты аңызған айналған футболшы 39 жасқа толды

Футболдан Әлем чемпионаттары тарихындағы үздік сұрмерген әрі қазіргі титул иегері, аргентиналық Лионель Месси спорттық мансабын қашанға дейін жалғастыратынын айтты, деп хабарлайды Tengri Sport.

Әлем чемпионаты топтық кезеңінде Австрияға қарсы жеңісті матчтен кейін журналист Мессиге тағы қанша жыл өнер көрсетуді жоспарлап жүргені туралы сұрақ қойды.

"Пайдам тиіп, физикалық тұрғыда өзімді жақсы сезініп, командаластарыма көмектесе алатын болсам, тағы біраз уақыт жалғастырамын... Мен әрі қарай ойнай беремін", - деп жауап берді ойыншы.

- Яғни, сіз 2030 жылғы Әлем чемпионатында ойнайсыз ба?

"Білмеймін. Шынымды айтсам, қазір ол туралы ойлап жүрген жоқпын. Ол әлі алыс сияқты... Бірақ жоғарыда айтқанымдай, мен бүгінгі күнмен өмір сүремін және қазіргі сәтке назар аударғанмын", - деп мәлімдеді аргентиналық.

Айта кетейік, 24 маусымда атақты футболшы 39 жасқа толды.

Лионель Мессидің рекордтары

Еске сала кетейік, Аргентина құрамасының шабуылшысы кәсіби мансабын "Барселона" жастар командасында бастап, 2004 жылы 17 жасында негізгі құрамда алғаш рет алаңға шыққан болатын.

Месси мансабында жеңіп алған трофейлер саны бойынша рекорд иесі – оның қоржынында 48 марапат бар. Оның ішінде бір әлем чемпионаты, екі Америка кубогі, төрт Чемпиондар лигасы және Испанияның 10 дүркін чемпиондығы бар.

Сондай-ақ Лионель жеңіп алған "Алтын доптар" саны бойынша да рекордшы – оның сегіз добы бар. Кейінгі рет аргентиналық бұл марапатты 2023 жылы "Интер Майами" ойыншысы ретінде алды, бірақ оның бұл жүлдеге ие болуына 2022 жылғы Әлем чемпионатындағы жеңісі басты себеп болды.

Лионель Месси 2026 жылғы ӘЧ-да Әлем чемпионаттары тарихындағы ең үздік сұрмерген атанды – оның еншісінде 28 матчте 18 гол бар. Сонымен қата ол тарихта алты Әлем чемпионатында өнер көрсеткен екі ойыншының бірі. Бірақ сол турнирлердің бірінде Мессиге гол соғу сәті түспеген.

Бұған дейін Opta статистикалық порталы топтық кезеңнің екінші туры аяқталғаннан кейін Аргентинаны футболдан Әлем чемпионатының басты фавориті деп атаған болатын.

Ал Португалия құрамасының жұлдызы Криштиану Роналду Лионель Месси туралы сұраққа шамданып қалды.