Айбек Оралбай бокстан Әлем кубогінде қарсыласын ойсырата жеңді

Аса ауыр салмақтағы қазақстандық боксшы, әлем чемпионы Айбек Оралбай Әлем кубогі кезеңінің 1/4 финалында ағылшын Мэтью Уильямстан басым түсті, деп хабарлайды Tengri Sport.

Жекпе-жек 90 келіден жоғары салмақ дәрежесіндегі 1/4 финал аясында өтті.

Кездесу толық үш раундқа созылып, қазақстандық чемпионның айқын жеңісімен аяқталды.

Әлем кубогінің регламентіне сәйкес, турнирде үшінші орын үшін талас өткізілмейді, сондықтан Айбек кем дегенде қола жүлдені иеленеді.

Жартылай финалда отандасымыз бразилиялық Жоэль Рамоспен қолғап түйістіреді.

Айта кетейік, қазақстандық Айбек Оралбай былтыр осы салмақ дәрежесінде әлем чемпионы атанған болатын. Ливерпульде өткен турнир финалында ол өзбекстандық Жахонгир Закировты жеңген еді.

Қазақстан құрамасында Әлем кубогінің сегіз жартылай финалисі бар

Еске сала кетейік, бұған дейін Қытайдың Гуйян қаласында өтіп жатқан Әлем кубогі кезеңінің жартылай финалына Санжар Ташкенбай (50 келіге дейін) мен Абылайхан Жүсіпов (70 келіге дейін) жолдама алған болатын.

Сонымен қатар кем дегенде қола медальға Аида Әбікеева (65 келіге дейін), Виктория Графеева (60 келіге дейін), Назым Қызайбай (54 келіге дейін), Дина Исламбекова (80 келіден жоғары), сондай-ақ Валерия Аксенова (80 келіге дейін) ие болды.

Бокстан Әлем кубогінде Қазақстан-АҚШ жекпе-жегі айқын жеңіспен аяқталды