2026 жылғы Әлем чемпионатында топтың алғашқы көшбасшысы анықталды

Мексиканың Сапопан қаласындағы "Эстадио Акрон" стадионында 2026 жылғы футболдан әлем чемпионатының екінші матчі өтті. Онда Оңтүстік Корея мен Чехия құрамалары кездесті, деп хабарлайды Tengri Sport.

Екі команданы да турнирдің фавориті деу қиын, сонымен қатар чехтер де, корейлер де плей-офф кезеңіне шығудан дәмелі.

Командалардың басты жұлдыздары

Чехия құрамасының сапындағы ең қымбат ойыншы - команда капитаны Ладислав Крейчи. Ол өткен маусымды ағылшындық "Вулверхэмптон" сапында өткізген.

Сондай-ақ германиялық "Байерден" Патрик Шик, "Вест Хэмнің" тәжірибелі ойыншысы Томаш Соучек және француздық "Лионда" өнер көрсететін Павел Шульцті ерекше атап өтуге болады.

Корейлерге келетін болсақ, олардың құрамында Чемпиондар лигасының қазіргі жеңімпазы - "Пари Сен-Жерменнің" шабуылшы шебіндегі жартылай қорғаушысы Ли Кан Ин ойнайды. Бірақ көп жылдар бойы команданың басты жұлдызы Сон Хын Мин болып қала бермек. "Тоттенхэмнің" бұрынғы ойыншысы қазір "Лос-Анджелесте" өнер көрсетеді.

Оңтүстік Корея - Чехия: ойын барысы

Бірінші таймда командалар бір-бірінің қақпасынан саңылау таба алмай, екеулеп бар болғаны бір соққыны ғана дәл бағыттады. Бұл ретте допқа көбірек кореялық футболшылар иелік етті.

Екінші таймда корейлер басымдықты одан әрі арттырғанымен, бұл есеп ашуға көмектесе қоймады.

Матчтегі алғашқы голды чех капитаны Крейчи соқты. Ол 59-минутта ауттан алысқа лақтырылған допты баспен қақпаға бағыттай білді.

Корейлер 67-минутта жауап берді. ПСЖ жұлдызы Хван Ин-Бомға нәтижелі пас шығарып берді, ал ол шабуылды сәтті аяқтады.

10 минуттан кейін Соучек айып добын орындау кезінде корейлер қақпасына екінші голды соқты, бірақ доп офсайдқа байланысты есепке алынбады.

Келесі шабуылда-ақ, 80-минутта О Хён Гю корейлерді алға шығарды. Нәтижелі пастың авторы - тағы да Хван Ин-Бом.

Матч есебі - 2:1, Оңтүстік Корея құрамасы жеңіске жетті.

Мексикалықтар топ көшбасшысы атанды

Осы нәтиженің арқасында әлем чемпионатында топтың алғашқы көшбасшылары мен плей-оффқа шығу жолындағы аутсайдерлер белгілі болды. А тобын доп айырмашылығы бойынша турнир қожайындары - Мексика бастап тұр, корейлер екінші орында.

Чехия мен Оңтүстік Африка құрамалары ұпайсыз соңғы және соңғының алдындағы орындарды иеленді.

Футболдан әлем чемпионатының алғашқы матчі Мексика құрамасының ОАР-ды айқын басымдықпен жеңуімен аяқталған болатын.