ӘЧ-2026: Килиан Мбаппенің келесі матчі өтпей қалуы мүмкін - БАҚ

Фото: DURAOFOTO/depositphotos.com

Маусымның 23-не қараған түні топтық кезең аясында жоспарланған Франция - Ирак матчі ауа райының қолайсыздығына байланысты тоқтатылуы немесе басқа уақытқа ауыстырылуы мүмкін, деп хабарлайды Tengri Sport CBS телеарнасына сілтеме жасап.

Маусымның 23-не қараған түні топтық кезең аясында жоспарланған Франция - Ирак матчі ауа райының қолайсыздығына байланысты тоқтатылуы немесе басқа уақытқа ауыстырылуы мүмкін, деп хабарлайды Tengri Sport CBS телеарнасына сілтеме жасап.

Басылым мәліметінше, ауа райы болжамына сәйкес, Филадельфияда (АҚШ) өтетін кездесу кезінде қатты жел соғып, найзағай ойнайды деп күтіледі.

"Дауыл күшейіп, найзағай ойнайды, кей жерлерде торнадо қаупі бар. Сондай-ақ кей аймақтарда нөсер жауын болып, соңы су тасқынына әкелуі ықтимал.

Мұның бәрі кешкі уақытта жол жүру ұзақтығының артуына, әуе рейстерінің кешігуіне, сондай-ақ ашық аспан астындағы іс-шаралардың, соның ішінде дүйсенбі күні кешке Lincoln Financial Field стадионында өтетін 2026 жылғы ерлер арасындағы Әлем чемпионаты матчінің кешігуіне немесе ауыстырылуына себеп болады", - деп жазады cbsnews.com.

Еске сала кетейік, матч Филадельфия уақытымен 17:00-ге (Қазақстан уақытымен 02:00) жоспарланған. ФИФА немесе Франция мен Ирак федерациялары ойынның тоқтатылуына немесе ауыстырылуына қатысты әзірге ресми мәлімдеме жасаған жоқ.

Айта кетейік, Иракқа қарсы ойында жеңіске жеткен жағдайда Франция құрамасы мерзімінен бұрын топтан шығу мүмкіндігін иеленеді.

Әзірге мундиальда гол соғу көрсеткіші бойынша мадридтік "Реал" шабуылшысы Килиан Мбаппе команда көшбасшысы болып тұр.

Instagram-дағы бұл жарияланымды көру

Equipe de France de Football (@equipedefrance) жариялаған жазба

ӘЧ кезінде АҚШ-тағы ауа райы алаңдаушылық туғызған

Еске салсақ, 2025 жылдың жазында АҚШ-та тарихта алғаш рет клубтар арасындағы үлкен Әлем чемпионаты өтті. Сол кездің өзінде көптеген жұлдыз бен жаттықтырушылар аптап ыстыққа шағымданған болатын.

"Күн өте ыстық, алғашқы ойын күндізгі сағат үште, біз дайын болуымыз керек, себебі бұл өте қиын болады", - деді "Реал" мен Бразилия құрамасының жұлдызды шабуылшысы Винисиус Жуниор.

"Бұл уақыт аралығы еуропалық көрермендер үшін өте ыңғайлы, бірақ командалар зардап шегіп жатыр", - деп "Пари Сен-Жермен" жаттықтырушысы Луис Энрике онымен келісті.

Ұлттық құрамалар арасындағы Әлем чемпионаты кезінде де күн өте ыстық. Турнирде ойыншылар су ішіп алу үшін әр таймда бір рет арнайы үзіліс қарастырылған.

Дегенмен, аптап ыстық ойын сапасы мен ойыншылар жағдайына ғана әсер етсе, найзағай мен дауыл кестені мүлдем өзгертуі мүмкін. Мысалы, клубтық Әлем чемпионатының бір ойыны - мексикалық "Пачука" мен австриялық "Зальцбург" арасындағы кездесу Цинциннатидегі найзағай салдарынан 1,5 сағатқа тоқтатылған еді.

Енді осындай жағдай төртжылдықтың басты турнирінде де қайталануы мүмкін.

Айта кетейік, АҚШ, Мексика және Канадада өтіп жатқан турнирде 104 матчтің 40-ы ойналды. Әзірге олардың ешқайсысы ауа райы жағдайына байланысты үзілген жоқ.