Әлем чемпионатында сенсация жасаған команда жарыстан шығып қалды

Мексика құрамасы футболдан әлем чемпионатының 1/16 финалында Эквадор командасын жеңді. Бұған дейін эквадорлықтар Германия құрамасын ұтып, сенсация жасаған болатын, деп хабарлайды Tengri Sport.

Мехикода өткен матч 2:0 есебімен аяқталды. Мексикалықтар екі голды да бірінші таймда соқты: 22-минутта Киньонес, ал 31-минутта Хименес көзге түсті.

95-минутта Эквадор ойыншысы Инкапье ойын ережесін бұзғаны үшін қызыл қағаз алып, алаңнан қуылды.

Матч қорытындысы Мексиканың пайдасына 2:0 есебімен тіркелді.

Айта кетейік, Мексика - Эквадор матчы найзағай салдарынан кейінге шегеріліп, жоспарланған уақыттан бір сағатқа кеш басталды.

1/8 финалда мексикалықтар Англия - Конго ДР жұбының жеңімпазымен кездеседі.

2026 жылғы Әлем чемпионатындағы Эквадор - Германия матчы сенсациямен аяқталды

Еске сала кетейік, Эквадор топтық кезеңнің соңғы матчінде немістерді сенсациялық түрде жеңіп, әлем чемпионатының плей-офф кезеңіне жолдама алған болатын.

Германия құрамасына келетін болсақ, олар 1/16 финалда Парагвай командасынан жеңіліп, турнирден шығып қалды.

ӘЧ-2026 турнирінің тағы бір фавориті - Франция құрамасы - Швецияны ойсырата ұтып, 1/8 финалға шықты.