“Көз жасына ерік берді”: командасына жеңіс сыйлаған марокколық футболшының анасы эмоциясын жасыра алмады

Марокко құрамасы мен нидерландылық "ПСВ" клубының футболшысы Исмаэль Сайбаридің анасы ұлының әлем чемпионатының 1/16 финалындағы пенальти сериясында соққан жеңіс голына ерекше тебіреніспен жауап қатты, деп хабарлайды Tengri Sport.

Марокко құрамасы Нидерланды командасын пенальти сериясында тізе бүктіріп, 1/8 финалға жолдама алды. Есеп 2:2 болып тұрғанда шешуші голды жартылай қорғаушы Исмаэль Сайбари соқты.

Футболшы жеңісті бірінші болып трибунада отырған анасымен бірге тойлады. Әлеуметтік желілерде жарияланған бұл сәттер әлемнің түкпір-түкпіріндегі жүздеген жанкүйердің жүрегін елжіретті.

Бейнежазбада анасы ұлын құшақтап, көз жасына ерік бергенін көруге болады.

"Ананың махаббаты – әлемдегі ең асыл дүние";

"Жеңісте де, жеңілісте де ананың құшағы – ең жылы мекен";

"Марокконың жетістігі ананың ақ батасынан басталады";

"Ұлының анасына жасайтын ең үлкен сыйы – оны қуаныштан жылату", – деп жазды желі қолданушылары видео астында.

Айта кетейік, 25 жастағы Сайбари футболдағы жолын Бельгияда бастаған, алайда кейінгі 4 маусымды Нидерландыда өткізді. БАҚ мәліметтеріне сүйенсек, жартылай қорғаушының келесі клубы мюнхендік "Бавария" болуы мүмкін.

ӘЧ плей-офф кезеңіндегі Нидерланды - Марокко матчының тағдырын пенальти сериясы шешті

Бұған дейін Нидерланды құрамасы мен ағылшындық "Ливерпульдің" жұлдызды шабуылшысы Коди Гакпо Марокко қақпасына соққан голын шетінеп кеткен ұлына арнаған болатын.

Ал футболдан әлем чемпионатында 1/8 финалдың алғашқы жұбы анықталды.

Одан бөлек, ӘЧ 1/16 финалындағы Германия – Парагвай матчы сенсациямен аяқталды